អន្តរជាតិ៖ អាជ្ញាធរនៅប្រទេសកូឡុំប៊ីដែលធ្វើការជាមួយសហរដ្ឋអាមេរិក បានចេញផ្សាយវីដេអូមួយកាលពីថ្ងៃសៅរ៍ ទី២០ ខែមីនា បង្ហាញនូវកូកាអ៊ីនដែលរឹបអូសបានចំនួន ៣,៤តោន ដែលមានតម្លៃ ១២០លានដុល្លារអាមេរិក។

កងទ័ពជើងទឹកបាននិយាយនៅក្នុងសេចក្តីថ្លែងការណ៍មួយថា ថ្នាំញៀនត្រូវបានរកឃើញលើទូកល្បឿនលឿនហើយត្រូវដេញតាមដោយសមាជិកនៃកងទ័ពអាកាសរបស់ប្រទេសកូឡុំប៊ី។

បន្ទាប់ពីនាវានេះត្រូវបានតាមដានជាច្រើនគីឡូម៉ែតដោយកងទ័ពជើងទឹករបស់ប្រទេសកូឡុំប៊ី និងឆ្មាំឆ្នេរសមុទ្រ San Andres ទូកល្បឿនលឿនត្រូវបានស្ទាក់ចាប់បានចម្ងាយ ១២១ម៉ាយពីប្រជុំកោះ San Andres ។

បុរស៥នាក់ត្រូវបានចាប់ខ្លួនមានជនជាតិនីការ៉ាហ្គ័រ ៣នាក់ និងកូស្តារីកា ២នាក់។

ទោះបីជាមានការប្រយុទ្ធប្រឆាំងនឹងការជួញដូរគ្រឿងញៀនជាច្រើនទស្សវត្សមកហើយក៏ដោយ កូឡុំប៊ីនៅតែជាប្រទេសផលិតកូកាអ៊ីនកំពូលមួយរបស់ពិភពលោក ហើយប្រឈមមុខនឹងសម្ពាធជាបន្តបន្ទាប់ពីសហរដ្ឋអាមេរិក៕